Os ydych chi’n bwriadu astudio o leiaf dwy ran o dair (neu o leiaf 80 credyd y flwyddyn) o’ch cwrs gradd drwy gyfrwng y Gymraeg, gallwch ymgeisio am un o’n Prif Ysgoloriaethau, sydd werth £1000 y flwyddyn (neu hyd at £3000 dros gyfnod eich cwrs gradd).  
Bydd 50 o’r ysgoloriaethau hyn ar gael ar gyfer myfyrwyr a fydd yn dechrau astudio cyrsiau gradd o bob math – mewn prifysgolion led led Cymru – ym mis Medi 2012.

O’r Gyfraith i’r Gymraeg, o Ddiwinyddiaeth i Ddylunio Cynnyrch, o Hanes Cymru i Astudiaethau Ffilm a Theledu – mae bron i 300 o wahanol gyrsiau gradd bellach yn cynnwys digon o ddarpariaeth cyfrwng Cymraeg i fod yn gymwys i gael eu cynnwys yn yn rhan o’r cynllun hwn, felly beth am glicio ar y ddolen isod i weld os yw’r cwrs yr ydych chi’n bwriadu ei astudio yn ymddangos ar y rhestr ar gyfer 2012-13?

Mae’r dyddiad cau ar gyfer derbyn ceisiadau am Brif Ysgoloriaethau 2012-13 yn cyd-daro gyda’r prif ddyddiad cau ar gyfer cyflwyno ceisiadau UCAS, sef:

15ed Ionawr 2012

Er mwyn ymgeisio am ysgoloriaeth mae rhaid i chi fod yn aelod o'r Coleg Cymraeg Cenedlaethol ac mae modd ymaelodi ar y dudalen Ymaelodi. Bydd angen i chi nodi eich rhif aelodaeth ar y ffurflen gais.

£500 y flwyddyn (neu £1500 dros dair blynedd) yw gwerth y math yma o ysgoloriaeth, sydd ar gael ar gyfer myfyrwyr sy’n bwriadu astudio o leiaf traean (neu o leiaf 40 credyd y flwyddyn) o’u cwrs gradd drwy gyfrwng y Gymraeg.

Bydd 100 o Ysgoloriaethau Cymhelliant ar gael yn 2012, ac – yn wahanol i’r Prif Ysgoloriaethau – dim ond myfyrwyr sy’n bwriadu astudio cyrsiau gradd penodol yn un o’r naw maes academaidd canlynol fydd yn gymwys i ymgeisio amdanynt:

Gwyddorau’r Amgylchedd a Daearyddiaeth  
Busnes a Rheolaeth
Gwaith Cymdeithasol
Gwyddorau ac Astudiaethau Chwaraeon
Y Gyfraith
Gwyddorau Iechyd
Ieithoedd Modern Ewropeaidd
Mathemateg a Ffiseg
Seicoleg
Cemeg

Cliciwch ar y ddolen isod i weld os yw’r cwrs gradd yr ydych chi yn bwriadu ei astudio wedi ei gynnwys ymysg y 200 a mwy o gynlluniau astudio sydd bellach yn rhan o’r is-gynllun hwn. 

Mae’r dyddiad cau ar gyfer cyflwyno ceisiadau am Ysgoloriaethau Cymhelliant 2012-13 yn cyd-daro gyda’r dyddiad cau a bennir gan UCAS ar gyfer derbyn ymatebion gan ddarpar-fyfyrwyr i’r cynigion a roddwyd iddynt gan brifysgolion, sef :

4 Mai 2012

Er mwyn ymgeisio am ysgoloriaeth mae'n rhaid i chi fod yn aelod o'r Coleg Cymraeg Cenedlaethol. Gallwch ymaelodi trwy lenwi ffurflen ar y dudalen Ymaelodi.  Bydd angen i chi nodi eich rhif aelodaeth ar y ffurflen gais.